Tropa frankistek Durango bonbardatu zutenetik 88 urte bete dira eta Udalak oroimenezko ekitaldia egin zuen atzo. Ohitura bilakatu den legez, omenaldia egin zieten Durangoko 231 hildakoei eta osterantzeko biktima guztiei. Lore-eskaintza egin zuten Durangoko hilerrian eta, ondoren, oroitzapenezko pebeteroa piztu zuten Santa Mariako elizpean.

Ezkurdi plazan egin zuten ekitaldian, Mireia Elkoroiribe alkateak memoria bizirik mantentzearen garrantzia azpimarratu zuen: «88 urte igaro badira ere, martxoaren 31k presente jarraitzen du durangar guztien memorian».

Aurtengo omenaldian bonbardaketak bizi izan zituzten pertsonengan jarri zuten arreta. Bertan izan ziren, hain zuzen, bizirik irten zirenetako batzuk: Mikel Aretxaga, Lidia Igor, Edita Gomez, Maite Andueza eta Emilio Aperribay.

Aurten ere, goizean, 8.30ean, lehenengo aire-erasoaren alarma soinua entzun zen Durangon eta arratsaldean, 17.45ean, bigarrenarena. Halaber, 19.30ean Andra Mari elizpean emanaldi batekin omendu zituzten biktimak, Gerediaga Elkartearen eta Kriskitin Dantza Taldearen eskutik.