F Ligari 90 minutu besterik ez zaizkio falta denboraldiari amaiera emateko. Partida Tenerifen jokatuko du Realak, seigarren postuan amaitzeko aukerarekin. Ez da edozein datu, donostiarrek ikasturte hasieran ezarritako oinarrizko helburua bete dutela baieztatuko baitu, iaz egindakoa hobetzea, alegia.

Nerea Eizagirrek eta Lucia Rodriguezek atzo Zubietan nabarmendu nahi izan zuten puntuetako bat da, denboraldiak «zapore gazi-gozoa» utzi duela onartu arren. Azken finean, «anbizio handikoak gara, eta lehen itzuliaren emaitza positiboekin zerbait gehiago egin genezakeela ikusten genuen», azaldu zuen Rodriguezek.

Baina denboraldia erabat okertu zen eta, azken asteotan jokoa eta emaitzak hobetu diren arren, taldea maldan behera ibili da hiru hilabetez. Ez da erraza azalpena aurkitzea, Eizagirrek onartu zuen bezala. «Xehetasun txiki asko egoten dira. Futbola horrelakoa da. Astean zehar oso ondo lan egin dezakezu, eta gero batzuetan dena ateratzen zaizu, lehen itzulian bezala, eta beste batzuetan ezer ez». «Oso gogorra izan da denontzat -gaineratu zuen taldekideak-, saiatu, saiatu eta galtzen duzulako. Ondo entrenatu ezean, normala da gauzak ondo ez ateratzea. Baina ondo entrenatzen genuen, eta gero ez ziren gauzak ateratzen. Frustragarria da».

Horri Jose Luis Sanchez Veraren iragarpena gehitu zitzaion, alegia, ekainean kluba utziko duela, klubarekin kontratua amaitu aurretik etetea adostu ondoren. Erabakiak harridura sortu zuen, eta futbolariak fokuan jarri zituen. Entrenatzaileak berak aldagelan maniobrarik egon ez dela adierazi zuen eta eskerrak eman zizkien jokalariei. Nolanahi dela, zaratak ez du etenik izan. «Jokalariok kritika gehiegi jaso ditugula uste dut -gaitzetsi zuen Eizagirrek-. Aste gogorrak izan dira, batez ere barruan bizi izan dena ez delako horrela izan. Ez da «oherik» egon. Josek argi utzi zuen eta guk ere argi daukagu. Izan ere, ez genuen espero joatea. Harreman ona dugu berarekin eta staffarekin».

TALDE DESBERDINA

Harremana ona izateaz gain, Sanchez Vera «entrenatzaile ona izan da eta gauza asko eman dizkigu. Ez du hemen jarraituko, baina taldeak asko ikasi du, asko hazi da, eta datorren urtean aurtengoa baino talde gogorragoa izango da», esan zuen tolosarrak.

«Pertsona exijentea da jokalariekin, klubarekin... —gaineratu zuen—. Gehien ikasi dugun gauzetako bat dela uste dut. Talde gisa egunerokotasuna ulertzeko modua pixka bat aldatu dugu, lana, azken urteetan agian eman ez diren xehetasunak eta Joserekin bai...». «Taldeak urrats horiek egin ditu, emaitzak alde batera utzita. Gaur egun garen taldeak ez du zerikusirik denboraldi hasieran genuenarekin. Hurrengoan talde askoz indartsuagoa izango garelakoan nago eta, ziurrenik, garrantzi askoz handiagoa emango diegu lehen ematen ez genien gauzei».

Taldea ere berria izango da bere osaeran. Bederatzi futbolari joan dira eta gutxienez beste horrenbeste etorriko dira, teknikari berriez gain. «Gu bezala, kluba exijentea da, beti gehiago nahi duena. Ez dut zalantzarik horrela izango dela orain ere», adierazi zuen Lucia Rodriguezek proiektu berriari buruz.

«Hazten jarraitzea espero dugu», esan zuen Eizagirrek, eta, joango direnena baino, geratzen direnen garrantzia nabarmendu zuen. «Jokalari batek geratzea edo etortzea erabakitzen duenean, Zubietan eraikitzen ari den zerbaitetan sinesten duelako da. Horretan sinesten ez baduzu edo gauza hobeak daudela uste baduzu, irteteko erabakia hartzen duzu. Jende askori gustatuko litzaioke Realean jokatzea, argi daukat. Badago jendea joan dena eta gero itzuli dena, eta hemen ondo dagoela onartzen du. Lasaitasuna izan behar dugu. Datorren urtean, gaudenak ahalik gorena geratzen saiatuko gara berriro, talde gisa berriz ere gure onena emateko ilusioarekin. Egon nahi duena etor dadila; datorrena, ematera etorriko da. Ahalik gorena dagoen talde on bat izaten saiatuko gara».

Kapitainak, gainera, «aurten asko hazi eta asko ikasi duen aldagela» ikusten du. Eta argi dauka «maila handiko jokalariak» dituela bertan, gazte heldu berriak barne. «Maila altua dute. Asko dute ikasteko eta hobetzeko oraindik, guk guztiok daukagu, baina egiten ari dira. Eta ilusio handiz. Hori da Realak duen gauza ona, etxeko jendea ateratzen duela, taldea bezala hazten doana, nahiz eta urte batzuk hobeak eta beste batzuk okerragoak izan. Eta, tira, seigarren postuan amaitzen badugu, aurtengoa txarra-txarra ez da izango».