Gaur estreinatuko dira antzekotasunak dituzten bi film; forma eta tonu oso desberdinak izan arren, gai bera dute: munduko hainbat lekutan LGTBIQ+ komunitateak oraindik jasaten duen zapalkuntza. Ray Yeung zuzendariaren “All Shall Be Well” (“Todo saldrá bien”, “Tout ira bien”) eta Emanuel Parvu-ren “Trei kilometri până la capătul lumii” (“Three Kilometres to the End of the World”) dira lan horiek.

“All Shall Be Well” filmak Hong Kongera garamatza, non LGTBIQ+ komunitateak oraindik ere eskubide mugatuak dituen; esaterako, sexu berekoen ezkontzak ez daude legez onartuta. Filmak Angie eta Paten istorioa azaltzen du: 60 urte inguruko bi emakume dira, eta hiru hamarkadaz elkarrekin bizi izan dira. Baina Paten bat-bateko heriotzak Angieri erronka latza jarriko dio: maitasun-harremana legez aitortua ez denez, familiaren eta sistemaren aurrean borrokatu beharko du.

Parvuren lanak, aldiz, Danubioren deltako paisaia ederraren azpian, aniztasunarekiko intolerantzia ezkutatzen dela erakusten du. Protagonista eraso homofobo bortitz baten biktima da, eta filmak komunitate itxuraz baketsuetan ere existitzen diren zapalkuntza moldeak agerian uzten ditu.

Distantzia geografikoek eta desberdintasun kulturalek ez dituzte estaltzen bi film hauetan agertzen diren egia mingarriak: LGTBIQ+ pertsonak oraindik ere zapalduta daude leku askotan.