Inoiz ahaztuko ez duen omenaldi zirraragarria jaso zuen atzo, Eibarren, Ane Santestebanek bere agurrean. Eibarko Hiria Sari Nagusiaren irteeran, taldeak, tropelak eta txirrindularitza eskolek bizikleta pasabide batekin agurtu zuten abiatu aurretik. Lasterketan zehar, Laboral Kutxako taldekide Debora Silvestrik lorturiko garaipena eskaini zion errenteriarrari. Eta helmugan, taldekideen omenaldia beroa jaso zuen, Amondarainek, Erasok eta Ostolazak aurreskua dantzatuta. Kirol honengatik eman duen guztiaren parte txiki bat besterik ez zen izan.