Senatuan izandako eztabaida luze eta sakon baten ondoren, Uruguai eutanasia legeztatu duen lehen herrialde latinoamerikarra bihurtu zen atzo.

«Heriotza Duina» izeneko legeak «hiltzeko prozesua duintasunez igarotzeko» eskubidea bermatzea du helburu, gaixotasun sendaezin eta atzeraezinen fase terminalean dauden edo horien ondorioz sufrimendu jasanezina pairatzen duten adin nagusiko eta gaitasun mentala duten pertsonen kasuan eutanasia despenalizatuz.

«Iritzi publikoa honetaz arduratzeko eskatzen ari zaigu», adierazi zien legegileei Montevideon Patricia Kramer senatariak, Uruguai gobernatzen duen ezkerreko koalizioko kideak. Sendabiderik gabeko gaixotasunak dituzten milaka pazienteez gain, eztabaidaren sustatzaile nagusietako bat Fernando Sureda izan zen, Uruguaiko Futbol Elkarteko aurpegi ezaguna, 2019an eutanasia legeztatzeko eskaria egin zuena, ELAk (alboko esklerosi amiotrofikoa) eragindako sufrimenduari amaiera emateko. Gaitz horrek heriotza eragin zion 2020an.

Latinoamerikako beste herrialde batzuetan, hala nola Kolonbian eta Ekuadorren, eutanasia epai judizialen bidez despenalizatu da. Hala ere, Uruguairen kasua eskualdean lege bidez berariaz onartu den lehena da.

ELIZAREN AHOTSA

Zenbait senatarik beren desadostasuna adierazi zuten bilkuran, besteak beste, Martin Lema (Alderdi Nazionala, zentro-eskuina) eta Pedro Bordaberry (Alderdi Colorado), zeinak salatu baitzuen legea «soilik medikuen ikuspegitik» idatzita dagoela eta ikuspegi juridikoa alde batera utzi dela.

Hala eta guztiz, oposiziorik handiena Eliza katolikotik etorri zen. Bozketaren aurretik, Daniel Sturla Montevideoko artzapezpikuak uruguaitarrei dei egin zien «bizitzaren dohaina defendatzera eta gogoratzera pertsona orok merezi duela zaindua, lagundua eta babestua izatea bizitzaren azken unera arte».

Buruzagi erlijiosoak adierazi zuen ere «eutanasiak heriotzaren kultura sustatzen duela».

Uruguai berriz ere demokraziaren eredu bilakatu da.