Altsasuko inauteriak berreskuratzeko ekarpen handia egin du, 1970eko hamarkadatik, Galdakaoko Andra Mari dantza taldeak. Kulturaz harago doan lotura ere sortu da bi herrien artean. Elkarlana hasi zenetik mende erdi igarota, harreman hori modu instituzionalean jaso nahi izan zuten atzo bi herrietako alkateek, Iñigo Arriandiaga galdakoztarrak eta Javier Ollo altsasuarrak, Galdakaoko Torrezabal kultur etxean egin zuten senidetze ekitaldian. Sinbolikotik asko izan zuen hitzorduan, arlo desberdinetan harremana sakondu nahi dutela adierazi zuten.