Urrezko Aizkorako lehen finalerdiak jokatuko dira gaur eta bihar. Gaur 12.00etan Urduñan jokatuko da aurreneko neurketa. Bertan, Atutxa II.a, Erasun eta Lopez lehiatuko dira. Bihar, berriz, Deustun jokatuko da bigarren finalerdia, 12.30ean hasita. Nazabal, Rekondo eta Mugertza II.a arituko dira lanean. Bakoitzetik aurreneko sailkatua sartuko da finalera, eta azkeneko saioan arituko den azkenekoa nor den hirugarren finalerdian erabakiko da, eta han asteburu honetako bigarren sailkatuak eta Etxeberria neurtuko dira, hemendik bi astera.

Finalerdi guztietan lan bera egin beharko dute aizkolariek. Hasteko, 45 ontzako enborra zeinek kolpe gutxiagotan moztu neurtuko dira. Bigarren lanean, tamaina bereko enborrarekin arituko dira, erlojuz kontra. Hirugarrengoan, 45 ontzakoa izango dute berriro ere aurrean, baina oraingoan zutik jarrita. Laugarrengoan, 60 ontzako enborra zeinek lehenago erdibitu arituko dira, eta azkenik, hiru kana-erdiko eta bi 60 ontzako moztu beharko dituzte.

Lanak laburra izaten jarraitzen du, baina aurrekoen aldean apur bat luzatzen da. Gauzak normal joaten badira, iraupen probak erabaki beharko luke, baina gainerakoetan ere edozein adarrek dena hankaz gora jar dezake.

Lehen finalerdian Atutxa izango da garaipena lortzeko faborito nagusia. Bizkaitarrak pasatu beharko luke finalera, lan hauek, gainera ongi joaten zaizkio, eta bera ez sartzea ezuste handi samarra izango litzateke.

Aurreneko postua lortzen ez duenarentzat, bigarrena ere ez dago gaizki, oraindik finalean sartzeko beste aukera bat izango bailuke. Postu horretarako Ander Erasun Juanjo Lopezen aurretik agertzen da, eta azkeneko emaitzek ere hori pentsarazten dute, baina lan hauetan ezusteetarako ateak ere zabalik egoten dira.

Bihar jokatuko den finalerdirako, berriz, inork ez dauka zalantzarik, Floren Nazabal izango baita faboritoa. Gauzak normal joaten baldin badira, txapeldunak finalean izan beharko luke. Bigarren posturako gauzak askoz ere estuago agertzen dira. Rekondo eta Mugertza ongi moldatzen dira lan hauetan, eta hor edozeinek egin lezake aurrera. Dena dela, kanporaketa oso erakargarria agertzen da.

Bi finalerdietako saioak azkeneko proban erabakiko diren errezeloa dago, baina zutik jarritako enborrek ere min handia egin izan dute, eta hor ere egon daiteke gakoetako bat. Iraupen proban erabaki ahal izateko, aurretik denbora gutxi galdu beharra izango dute, bestela aukerarik ez da izango.