Urrezko Aizkorako finala jokatuko da gaur, arratsaldeko zazpietatik aurrera, Azpeitiko Izarraitz pilotalekuan. Bertan Floren Nazabal, Aitzol Atutxa eta Jon Rekondo lehiatuko dira txapela lortzeko asmo eta helburuarekin.

Floren Nazabal da egungo txapelduna, eta bera aterako da garaipena lortzeko faborito ere. Inor gutxik jartzen du bere garaipena zalantzan, baina beste biak galtzeko oso gutxirekin joango dira eta presio guztia izango du nafarrak. Hala ere, eskarmentu handikoa da, eta guztia ondo gainditzeko gai izango da. Bere lana ongi egiten badu, ez dute gainerakoak lan erraza izango bera menderatzea.

Aitzol Atutxa da askorentzat etorkizuneko txapelduna. Oso gaztea da oraindik, baina egungo aizkolaririk onenetakoa da dagoeneko. Bizkaian ez dauka aurkaririk, eta Euskal Herri mailan ere mailarik gorenean dabil. Mutil handia eta indartsua da, eta kolpea ere horrelakoa du. Lan hauek ongi doazkio, eta galtzeko gutxirekin joango da. Kontuz ibili beharko du Nazabalek berarekin.

Jon Rekondo ere galtzeko gutxirekin joango da Azpeitiko final handira. Leitzarra askotan nerbioekin borrokan ibiltzen da, eta horiek gainditzen baldin baditu, beste bi aurkariak estu hartzeko gai da. Bere hasierako helburua finalean izatea zen, eta behin hori lortuta, lasai joan beharko luke gaurko saiora.

Urrezko Aizkora honetan lanak laburrak baina azkarrak izaten dira, eta azkenerako horrek sortzen die nekea. Normalean iraupen proban erabaki beharko litzateke lehia, baina zutikako enborrek ere min handia egin izan ohi dute. Dena dela, zutikako lanetan ere ongi moldatzen direnetakoak dira hiru aizkolariak, eta arazoren bat izan ezean, horrek ez luke ezer erabaki behar. Dena dela, lanak laburrak izanik, enborrak ere izan daitezke epaia jartzen dutenak; izan ere, adarren bat ateratzea nahikoa izaten da denbora galtzeko, eta hori gertatuz gero, bakarren bat ere gera daiteke finala irabazteko inongo aukerarik gabe.

Lan luzeagoa

Orain arte egin dutena baino lan luzeagoa izango dute gaur egin beharrekoa. Hori bai, hasteko, orain arteko proba guztietan bezalaxe, 45 ontzako enborra zeinek kolpe gutxiagotan moztu izango da aurreneko lana.

Bigarren proban, tamaina bereko enborra izango dute aurrean, baina oraingoan erlojuz kontra ebaki beharko dute. Hirugarren lanean, 60 ontzako zutikako enborra ebaki beharko dute, eta hor egongo da orain arteko aldaketarik garrantzitsuenetakoa, aurreko kanporaketetan tamaina horretako zutikako enborrik ez baitute erdibitu. Laugarren lanean, tamaina bereko etzaniko enborra moztu beharko dute.

Bosgarren lanean, zutikako kana-erdiko bat eta etzaniko beste bat ebaki beharko dituzte. Eta azkenik iraupen proba iritsiko da, eta hor ere orain arteko probetan baino lan luzexeagoa izango dute, bakoitzak lau kana-erdiko eta bi 60 ontzako moztu beharko ditu.

Txapelketa honetan izen garrantzitsu batzuk falta diren arren, hasieran faboritoen zerrendan agertzen ziren hirurak izango dira gaur arratsaldeko finalean. Azkenengo saio hau Azpeitian jokatuko da, baina ez da gipuzkoarrik izango. Nafarroak izango du gehiengoa bi aizkolarirekin, eta hirugarrena Bizkaikoa izango da. Ikuskizuna prest dago, eta ikusle kopuru oso ona espero dute Izarraitz pilotalekuan.