Gaztedik irabazi ditu orain arte jokatu diren bi pisuetako txapelak eta arinetan ere onena izan daitekeela erakutsi nahi du. Bihar abiatuko da 600ekoen txapelketa, Loiun, udaletxeko plazaren ondoan, 11.30ean.

Pisu honek ere, besteek bezalaxe, hiru jardunaldi izango ditu, eta denetara punturik gehien batzen dituen taldeak lortuko du garaipena.

Aurtengo Euskal Herriko Txapelketaren erdia amaitu da, eta Goiherrik, azken urte hauetako onenak, aurten ez du txapelik lortu. Beste aukera bat bihartik aurrera izango da, baina Gaztedi ere asmo horrekin aterako da berdegunera. Goiherrik bi talde plazaratuko ditu, eta hiru Gaztedik. Banarekin, berriz, Mutriku eta Getxo joango dira.