EMF-k antolatutako mendi lasterketen Euskal Herriko Txapelketa hil honen 14an jokatu zen Idiazabalen. Axeri Trail izan zen euskal espezialista sasoikoenak jaso zituen proba.

Seniorretan, nesketan, Maite Maiorak ez zuen hutsik egin. Errekorra ezartzeaz gain, 12 minutuko aldea atera zion bigarren sailkatuari, Nahia Quincocesi. Hirugarrena Elena Calvillo izan zen. Mutiletan, Aritz Egeak argi utzi zuen oso indartsu dagoela. Egeak ere lasterketa horretako marka ondu zuen. Bigarren Hassan Ait Chaou sailkatu zen, eta hirugarren, Abderrahim El Quayed. Berez, Oier Araiznabarretak bigarren postua eskuratu zuen, baina federatuta ez zegoenez, ez da euskal txapelketan sailkatu.

Seniorrez gain, Euskadiko Mendizale Federazioaren txapelketak beste irabazle batzuk utzi zituen. Beteranoetan, Elena Calvillo eta Carlos Garcia; promesetan, Maria Zabala eta Joanes Goitisolo; juniorretan, Xabier Macias; eta kadeteetan: Josu Galvez.