Kirmen Uriberen «Bilbao-New York-Bilbao» eleberria ingelesez argitaratuko da datorren urriaren 20an. Seren Books argitaletxeak kaleratuko du liburua, eta Elizabeh Macklin New Yorkeko idazleak itzuli du euskaratik ingelesera. Eleberria ingelesez argitaratuko dela baliatuz, idazle ondarroarrak zenbait ekitalditan parte hartuko du Ingalaterran. Horrela, urriaren 15ean hitzaldi bat eskainiko du Oxfordeko Unibertsitatean, eta 16an Londresko King's College ikastetxean. Aurkezpen publikoa urriaren 17an egingo da, Londresko Free Word kultur gunean, eta poesia errezitaldi bat eskainiko du , Jon Garañoren «Urrezko eraztuna» film laburra aurkeztearekin batera.