«Baliteke udaberrian edo udan Urdaibaiko Hegaztien Zentroa bisitatzera etortzea, baina orain neguko soinuak ere senti ditzakezu», azaldu du Urdaibai Bird Centerrek bisitariek zentroan aurki dezakete esperientzia berriaren inguruan.

Audiosfera da esperientzia ahalbidetzen duen tresna, soinu paisaia ezberdinak erreproduzituz. Ideia bat egiteko, urtaroaren arabera padurek izaten dituzten bisitariek sortarazten dituzten soinu banda ezberdinak nabarmendu dituzte: «Hegaztien dei eta soinuetan aniztasun ikaragarria dago urte osoan zehar. Imajina ezazu udaberrian ematen den kontzertu bikaina, milaka txorik egunsentian abeslari beren lurraldeak iragartzeko eta bikotea erakartzeko. Udazkenaren soinuak oso bestelakoak dira, eta migrazio-bidaietan gainetik pasatzen diren antzara edo kurrilo hotsek bereizten dute urtaro hau».

Eta zein da musika padurak elurtuta daudenean? Begiak itxita, hango paisaietara eramateko gai den azalpena eman dute zentroko adituek webgunean: «Ihiak estaltzen elur-geruza fin bat dago. Hotz handia egiten du paduran. Zuhaitzak biluzik daude eta hostoak zimelduta. Paduratik ahate txistularien txistuak entzuten dira eta, ondoren, kurlinta handiak bere kantu malenkoniatsuarekin bere presentzia erakusten du».