Euskaltegien aldeko giza katea Nafarroako Gobernuaren egoitzatik abiatu eta Hezkuntza Sailaren egoitzan bukatu da.
Protestaldian parte hartu dutenek euskara ikasi eta euskaraz bizitzeko eskubidea aldarrikatzeko kartelak eraman dituzte.
AEK-ko Helios del Santok eta IKAko Sagrario Alemanek gogoratu dutenez, Nafarroako euskaltegiek ez dute 2012ko urritik Gobernuaren euro bakar bat ere jaso.
2013 eta 2014. urteetarako –aurrekontuak luzatuta–, 245.000 euroko kontu-sail bana onartu da aurrekontuetan. Iaz, ez zen dirurik banatu eta, aurten, salatu dutenez, laguntzak jasotzeko deialdia ere ez dute egin.
Hori dela-eta, euskaltegiek «egoera larria» bizi dutela ohartarazi dute, baina hala ere egiten duten lanarekin jarraitzeko konpromisoa berretsi dute.