Lakuako Gobernuak eta Iberdrolak Arkamoko mendilerroan eraiki nahi duten parke eolikoaren aurka agertu zen astelehen honetan Kuartangoko Udalbatza.

Talde guztiek (EH Bildu, EAJ eta PP) babestu duten adierazpen instituzional batean azaltzen denez, «parke eoliko horrek ingurumenean eta paisaian duen eragin handiak eta biodibertsitatearen galerak ez dute konpentsatzen energia berriztagarrien ekoizpena».

Aixeindarrek, Energiaren Euskal Erakundea eta Iberdrola partaide dituen enpresak, 200 metroko altuerako 19 haize-errota jartzea proposatu du 95 MW sortzeko. Proiektu horren aurrean, Kuartangoko osoko bilkurak adierazi du «energia garbiak eta berriztagarriak erabiltzearen alde» dagoela, baina «ingurunearekin eta mendien erabilera onenekin bateragarriak izan behar dutela, eta betiere ahalik eta ingurumen inpaktu txikiena lortzeko».

EH Bilduk adierazi duenez, Arkamoren kasuan, Natura 2000 Sareko Kontserbazio Bereziko Eremua da eta, beraz, arriskuan jartzen ditu habitatak eta arriskuan dauden espezieak kontserbatzeko helburuak. Hori dela eta, Kuartangok uste du «ingurumen balio handiko eremu naturalen industrializazioak ez duela zentzurik», eta «leku antropizatuagoak, eskuragarriagoak eta ekologiaren eta paisaiaren ikuspuntutik inpaktu gutxiago eragiten dutenak» daudela.