Zazpi egunez euskara bizi eta euskaraz bizitzeko aukera ematen duen Mintzalasai festibala abiatuko da gaur. Hamargarren edizio honetan ere proposamen ugari eta ezberdinak badirela azaldu du Kepa Mouesca elkarteko presidenteak.

Hamar urte egiten ditu aurten Mintzalasaik; nola garatu da azken hamarkada honetan?

Formula ezberdin anitz izan dira, eragile eta partaide anitz badira, zaharrak, berriak eta berrikuntza anitz urtero. Ez gara lokartzen, ez gara akitzen, beti gauza berriak proposatzen ditugu publiko guztientzat; euskara ikasten dutenek, euskara menperatzen dutenek, denek badute haien lekua.

Antolaketan parte hartzen duten eragileen artean ere aldaketak izan dira?

Hasieran 20 bat ginen, eta orain antolatzaileak eta parte-hartzaileak gehitzen baditugu, 70 elkarte dira. Batzuek esku kolpeak ematen dituzte, beste batzuek aktibitateak antolatzen dituzte. Denen beharra dugu festibal hau aurrera atzeratzeko.

Baiona, Angelu eta Biarritz inguruan euskararen aldeko eragile guztiak biltzen dituzuela esan daiteke?

Bai, gehienak hor dira. Motibatuenak behintzat, bai; haurrekin lan egiten duten elkarteetan badugu Ohakoa elkartea, ikastolak, Udaleku elkartea, gero badugu AEK... eta elkarte anitz antolakuntzan ere badirenak.

«Euskara ikasten ari direnak hurbildu behar dira, beldurra bazterrean utzi behar dute, jakinez guk beti ukanen ditugula tresna pedagogikoak beraiek laguntzeko eta beraien parte hartzea sustatzeko»

Jaialdiak formatu ezberdinak izan ditu hasi zenetik orain arte. Nolakoa da aurtengoa, eta zergatik aukeratu duzue?

Uste dugu hoberena astebetekoa dela. Dakigun bezala, Biarritzeko programazioa biziki aktiboa da irailean, ekimen bakoitzarentzat lekua utzi behar dugu; esperientziak erakutsi digu hori dela egokiena.

Formatu berri honetan, egun bakoitza ardatz baten inguruan antolatu duzue.

Nahi izan dugu publikoa lagundu gaika antolatuz gure astebeteko programa. Lehen egunean mugimendua, bigarrenean pentsaketak, haurren eguna asteazkenean, plazera ostegunean; ostiralean dugu berrikuntza nagusia, haurrentzako pijama gaua, gaualdi bat ipuin kontaketarekin, film batekin eta animazio txiki batzuekin; larunbatean tokia uzten diogu Seaskak egiten duen Glissegunari, eta igandean, festa Marion aintziraren inguruan, denak elkartzeko.

Euskararen jaialdia bada ere, beti esan duzue ez dela bakarrik euskaldunei zuzendutakoa. Norentzat pentsatua da?

Haurrentzat eta helduentzat, euskara menperatzen dutenentzat, baina baita bidean direnentzat ere. Euskara ikasten ari direnak hurbildu behar dira, beldurra bazterrean utzi behar dute, jakinez guk beti ukanen ditugula tresna pedagogikoak beraiek laguntzeko eta beraien parte hartzea sustatzeko.

Hirigune hau ez da oso euskalduna. Zuen ekimenak pentsatzen dituzuenean hori kontuan hartzen duzue?

Bai, ikusten dugu, herri handi guztietan bezala, hizkuntza anitz badirela gune honetan, eta euskara bat dela besteen artean, baina inportantea zaigu biziaraztea eta azkartzea.

Eleaniztasunari begira izanen da mintzaldi bat aste horretan; Paris inguruan den Montreuileko aditu bat etorriko da, bertan aztertu duelako eleaniztasunaren eragina jendeekin. Hori izango da egungo gurasoei zuzendua, zeinen haurrek euskaraz ikastea erabaki duten. Ondoren, film bat izanen da, Frantziako hizkuntzei buruz, zein diren eta nola bizi diren.

Zein bilan egiten duzu hamar urte hauetan egindako lanaz?

Uste dut Mintzalasaik lortu duela bere tokia Biarritzen, eta ez zen erraza. Maider Arosteguy auzapeza prentsaurrekora etorri zen eta hori ez zen erraza. Uste dut ulertu duela Mintzalasaik eta euskarak badutela beren lekua urtean behin behingoz, baina baita urtean zehar ere, hainbat eta hainbat gauza egiten direlako euskaraz, eta gauzak ere antolatzen dituelako Herriko Etxeak leku publikoetan.