Beatriz Artolazabal Lakuako Berdintasun, Justizia eta Gizarte Politiketako sailburuak iragarri duenez, bere Sailak, musika sustatzaileekin batera, kontzertuetan eta ekitaldi handietan eraso sexistak saihesteko protokolo bat prestatu du.

Artolazabalek Onda Vasca irratian egindako elkarrizketa batean adierazi duenez, gida datorren astean aurkeztuko dute eta udalentzat egindakoaren jarraipena da, herrietako jaietan eraso sexistak saihesten laguntzeko tresnak martxan jartzeko.

«Jaialdietara, kontzertu handietara eta kongresuetara» bideratutako protokolo berriak «normalean jazarpen mota ezberdinak jasaten dituzten» langileak eta artistak hartuko ditu barne. Adibidez, udan BECen egingo den Euskal Encounterreko antolatzaileek protokolo hau eskatu dute «hurrengo edizioan erabiliko dutelako».

Artolazabalek adierazi du Kultura Sailarekin eta musika sustatzaileekin lan egin duela, eta gai horren inguruan duten «sentsibilizazioa» azpimarratu du. Izan ere, jakitun dira formatu handiko ekitaldi horietan sexu erasoengatik izaten diren salaketei aurre egin behar zaiela. Ildo horretan, adierazi du emakumeen %43k adierazi duela sexu jazarpena jasan duela noizbait jaialdi batean.