Eguraldia ere lagun izan duela, amaitutzat eman du larunbat honetan Oinatz Bengoetxeak bere pilotari ibilbidea. Horrenbeste ordu eman dituen Leitzako plazan zuriz jantzita eta lagunek inguratuta itxi du bere bizitzako etapa oparoa. Ogibidez harago, pilota bizi estilo bat izan da leitzarrarentzat, partida bakoitza pasioz bizi izan du eta ezustekoz beteta egongo den azken hau ere ez da, alde horretatik desberdina izango. 

2002ko urriaren 5ean Labriten profesional gisa debuta egin zuenean jarritako helburuen artean pilotan 20 urtez aritzea zuen nagusietako bat eta erronka hori beteta eskegiko ditu takoak. Ez hasiera batean uste izango zuen bezala, Baikok ez baitzion kontratua urrira arte luzatu nahi izan, baina horri ere buelta eman eta azken hilabeteetan sekula baino gehiago jokatuta eta gozatuta esango du agur. Plazako pilotaria izan da beti Bengoetxea VI.a, kalekoa, eta herriz herri aritu da azken hilabeteetan pilotaz eta haren inguruko guztiaz ahal beste gozatzen, ahalik eta zukurik gehien ateratzen. Berak ere kontuak egin ez baditu ere, udan 70 partida inguru jokatu ditu, egunen batean bi eta baita hiru partida ere jokatuta, Euskal Herri ia osoa zeharkatu du eta Atlantikoaz bestalde ere aritu da, Mexikon eta Ameriketako Estatu Batuetan zenbait partida jokatu baititu.

Otsailean Labriten izan zuen agurra handia izan bazen, Leitzakoa marka guztiak haustetik gertu izan da, partiden ondoren antolatu den herri bazkarian 800 lagunetik gora egon baitira eta girorik ez da falta izan azken urteetako pilotaririk karismatikoenetako bati agur esateko.