Bi urte baino gehiago daramatza Poloniako espetxe batean Pablo Gonzalezek, Ukrainako gerra kubritzen ari zela atxilotua izan eta gero. Igande honetan, Nabarnizen, bertako eta Elantxobeko herritarrek elkartasun egun bat antolatu dute, bere askatasuna aldarrikatuz.

10:00etan hasiko da elkartasun ekitaldia, Nabarnizeko plazatik Arrolara egingo duten martxa baten bidez. Arrolako kastroan argazki jendetsu bat egitea dute helburu,

13:00ean Arkaitz Estiballes bertsolariak hartuko du lekukoa eta bere atzetik iritsiko dira Ramon Zallo, Garbiñe Biurrun eta Oihana Goirienaren hitzartzeak. Asier Zugadik eta Garazi Urzaak ere parte hartuko dute, kontzertu txiki akustikoak eskainiz.

Honen ostean, Barrutiko eskolarteko lagunen mosaikoa eratuko dute, 15:00etan herri bazkaria antolatu eta Audience taldeko Ruben eta Gaizkaren, The Uskis, Iñigito Txapelpunk eta NAZen kontzertu akustikoei paso emateko.

Otsailaren 15ean Poloniako epaile batek zortzigarren aldiz luzatu zuen Pablo Gonzalezen espetxealdia. Poloniako agintariek euskal kazetariaren aurka egindako akusazioa «Errusiaren aldeko espioitza» da, baina zehaztasun gehiagorik gabe eta frogarik gabe. Horretarako, pisu handiegirik ez zuten frogak erabili zituzten, hala nola Pavel Rubtsoven izenean zegoen pasaporte errusiar bat, Moskun jaiotako Gonzalezen izen errusiarrari dagokiona.

Espetxean egon den bitartean, bere abokatuak eta familiak salatu dute espainiar kontsuletxeetako agintarien laguntza oso txikia izan dela eta Madrilgo Gobernuak ez duela Gonzalezen egoera aztertu Poloniako homologoekin.

Ordutik, «espioitza» akusazio ez-formal anbiguoaren pean, Radomeko segurtasun goreneko espetxean preso dago.