Nazio Batuen Erakundearen kalkulu ofizial berrien arabera, Melissa urakanak 90.000 etxebizitza baino gehiago eta 100.000 hektarea laborantza kaltetu ditu Kuban. Horrek esan nahi du urakanak kaltetutako etxebizitzen (partzialki edo erabat) kopurua %15 inguru igo dela, eta laborantza eremu kaltetuaren azalera %22 handitu dela Kubako Gobernuak hasiera batean argitaratutako datuekin alderatuta.

Ez dira hauek kalte bakarrak. Hasierako txosten ofizialen arabera, 600 osasun azpiegitura publiko inguruk eta 2.000 hezkuntza zentrok baino gehiagok kalte maila desberdinak jasan dituzte, biztanleen oinarrizko zerbitzuak arriskuan jarriz.

Zubiak, errepideak, trenbideak, presak, telefono antena ugari eta, bereziki, Sistema Energetiko Nazionala (SEN) ere kaltetu dira.

Nazio Batuetako ordezkaritzak «ikaragarritzat« jo du ekaitzak eragindako kaltea. Urakanak duela hamabi egun zeharkatu zuen Kubako ekialdea, Saffir-Simpson eskalan 3. kategoriako (5etik) indarrarekin.

«Agintariek mobilizazio erraldoia egin dute, bizitzak salbatzea lortuz —oraingoz ez da hildakorik jakinarazi— eta 735.000 pertsona ingururen ebakuazioa gauzatuz; hala ere, erakunde nazionalak gainezka daude», adierazi du NBEk.

Nazioarteko erakundeak pasa den astean aurkeztu zuten Kubarako Ekintza Plana, zeinak 74,2 milioi dolar (64 milioi euro baino gehiago) eskatzen dituen Melissak «larriki kaltetutako» biztanleriaren oinarrizko beharrei erantzuteko. Kalkuluen arabera, milioi bat pertsona inguru dira egoera horretan. Hala ere, guztira 3,5 milioi pertsona dira kaltetutzat jotzen direnak.

Kubak egoera honi aurre egin behar du jada ahultasun ekonomiko handiko testuinguru batean, AEBengandik pairatzen duen blokeoaren eraginez.