Hezkuntza eredu propio baten alde elkarrekin lan egiteko eskatu diete Lakua eta nafar Gobernuari

Hezkuntza Plataformen Topaguneak LOMCE ez aplikatzeko eskatu die nafar Gobernuari eta Lakuari. Era berean, «hezkuntza eredu propio baten definizioan», elkarrekin lan egitera gonbidatu ditu.

Espainiar Gobernuko Hezkuntza sailak DBH eta batxilergoko errebalidak atzeratu eta 2017. urtean definituko duela-eta, Hezkuntza Plataformen Topaguneak «aplikazioa bertan-behera uzteko» eskatu die Lakua eta nafar Gobernuari.

«Aurrera egiteko garaia da. Hitzetatik ekintzetara pasatzeko unea iritsi da. Hezkuntza sistema propioaren bidean urratsak eman, adostasuna oinarri izanik, eta gizartea osatutasunean aintzat harturik eraikiko den sistema ahalbidetuko duen tresnak abian jartzeko unea iritsi da», adierazi du plataformak ohar baten bidez.

Honen harira, «EAEn Heziberri martxan ez jartzea», eskatu diote Lakuako Hezkuntza sailari. Era berean, bai hauei bai Nafarroako Gobernuari elkarrekin lan egiteko gonbitea luzatu die «hezkuntza sistema propioaren definizioan». 

Horretarako ezinbestekotzat ikusten dute «hezkuntza erreformaren egutegia geldiaraztea» eta ikasturte hasierako ebazpenak «egoera berrira moldatzea», bertatik hezkuntza erreformarekin lotutako guztia kenduz.

Era berean, Lehen Hezkuntzan iaz martxan jarri ziren 3. mailako ebaluazioa eta ikasturte honetan martxan jarri nahi den 6. mailako froga bertan behera uztea aldarrikatu dute.