Naroa Romerok igorritako argazkia, berak eta bidelagun izan duen Aurorak aurten Hanoin ateratakoa da, eta askatasunaren aldeko lan eta borrokaz asko dakien Vietnam gogoan, lerro hauexek ere idatzi dizkigu: «Gure erosotasunean aske garelakoan bizi gara. Urrezko kaiolan libre garela diote. Eta zoriontasunaren atzetik galduta igarotzen dugu bizitza... Bitartean, zure begietan poza eskaintzen didazu, eskuzabaltasuna zure eskuetan, zure oinetan berriz, bidea aske egitearen zauriak agerian dituzu. Askatasunaren alde biak, gazi eta goxoa. Bizitzaren alde biak. Askatasuna? Zu zara, zure osotasunean».