Nahi baino gehiago luzatu zen bide aldapatsua amaituta, atzo bezalako egun batean ireki zituen ateak Gasteizeko Izaskun Arrue Kulturguneak. Eta, oharkabean, urtebeteko ibilbidea egina dute bertan, hasiera hartan ziurtatu bezala, «euskal kultura bizi, esperimentatu eta gozatzeko gunea» izan dadin lanean. 365 egun hauetan egindako urratsei begira jarri ziren atzo, lagunez inguraturik egin zuten ospakizun ekitaldian. ‘‘Bingoz bingo’’ ikuskizuna, Yogurinha Borova, Aurori Badiola eta dj saioak izan ziren euskara eta kultura erdigunean jarri dituen espazioa girotu zutenak.