Iñaki Artolak 2028ra arte luzatu du kontratua Baikorekin

Baikok eta Iñaki Artolak akordioa lortu dute kontratua beste hiru urtez luzatzeko, 2028ra arte. 31 urteko pilotaria pozik agertu zen sinatutako akordioarekin: «Beste hiru urtez jarraitu ahal izango dut pilota profesionalean hobetzen jarraitzeko».

Binakako Txapelketaren atarian berritu du kontratua Artolak. Hain justu ere, datorren astelehenean, azaroaren 24an, ekingo dio txapelketari Tolosako Beotibarren, Imaz lagun duela Laso eta Albisuren aurka jokatzeko. Hortxe egin zuen debuta Artolak 2014ko ekainaren 28an.

«Iaz Mariezkurrenarekin ia-ia txapela eraman genuen. Imaz beste mota bateko atzelaria da, baina urruti irits gaitezkeela uste dut», adierazi zuen Alegiakoak asteartean, txapelketaren aurkezpenean.