Durangon jakingo dira fase berrira doazen 18 bertsolarien izenak

Fasez aldatzear da Bertsolari Txapelketa Nagusia. Igandean amaituko da finalaurrekoen lehen txanpa Durangon eta fase honetan parte hartu duten 24 bertsolarietatik 18k egingo dute aurrera.

Horien izenak igandean jakingo dira, Landako gunean 17.00etan hasiko den saioaren ostean. Bertan hartuko dute parte Aitor Mendiluze, Iñaki Apalategi, Jon Maia, Miren Amuriza, Miren Artetxe eta Oihana Bartra bertsolariek eta, Bertsozale Elkartetik jakinarazi dutenez, sarrera guztiak agortu direnez saioaren egunean ez da leihatilarik irekiko. Hurrengo fasea Amurrion (azaroak 19), Donibane Lohizunen (26an) eta Iruñean (abenduak 2) jokatuko da.