Ipar Euskal Herriko herritar talde batek, ekainaren 8ko giza kate erraldoia gogoan, Giza Katea Mugaz Gaindi ekimena antolatu du maiatzaren 31rako. Erabakitzeko eskubideak euskal herritar ororen esku behar lukeela arrazoituta, aldarrikapen hori sei herritara zabalduko dute datorren larunbatean.

Hendaian (Santiagoko zubi zaharrean), Saran (Lizuniagan, Dutournieren harrian), Dantxarinean (Sareta ostatu ondoan), Baigorrin (Izpegiko kaskoan), Larrañen (Erroi mendin) eta Ütürzehetako lepoan osatuko dira giza kateak.

Herritarrei goizeko 11.30ean bertaratzeko deia egin diete, ekimena eguerdiko 12.00etan egiteko. Deialdia Hego Euskal Herriko biztanleei ere luzatu zaie.