‘Ez dugu izaterik aske haiek gabe, Iruñerria kalera presoak etxera’ lelopean, jendetza bildu da Iruñeko kaleetan. Manifestazioaren amaieran irakurritako testuan, Euskal Herriak bizi izan duen gatazka armatuaren konponbidean presoek duten garrantzia nabarmendu dute. «Preso eta errefuxiatuak ezinbestekoak dira bake prozesuan, eta haien ekarpena osoa izan dadin etxean behar ditugu. Gatazkaren konponbidean aurrera egiteko orain presoen ordua da. Haiek barrutik eta guk kanpotik, denak gurekin izan arte».

Azken hilabeteetan konponbidearen norabidean «pausu garrantzitsuak» eman direla ekarri dute gogora. «Herriak, jendeak, paper garrantzitsua dugu bertan, jendeak ekarriko ditu presoak etxera». Bide horretan atera dira kalera gaurkoan, «euskal presoak etxera» oihukatuz «barroteak urtzeko bezain ozen, elkartasuna azken ziegaraino heltzeko bezain ozen eta giltzarrapoa irekiko duen giltza dutenek entzuteko bezain ozen».

Eta lan horretan jarraitzeko konpromisoa agertu dute. «Denak gurekin izan arte borrokan segituko dugun herritarrak gara. Herria egin eta herriaz harro daudenak. Borrokan eta konpromisoan sinesten dutenak».

Horregatik, urtarrilaren 13an, gaur Iruñean egin bezala, Bilboko kaleak betetzeko deia egin dute.