Indarkeria matxista kasuendako larrialdi-baliabideak eta zerbitzuak mantentzen ari direla ziurtatu du Emakundek eta, are, zerbitzu hauek Covid-19 gaitzak eragindako egoerara egokitu ditu. Ondorioz, bide telematikoak indartu ditu biktimei premiazko arreta emateko.

«Bizi dugun alarma-egoera komunitario» honetan ere genero indarkeriaren aurkako «jarrera aktiboa» beharrezkoa dela dio Emakundek. «Hori geldiaraztea gizarte hau osatzen dugunon erantzukizun partekatua da, bakoitza gure erantzukizun-eremutik», agertu du prentsa ohar batean.

Hala, indarkeria matxistaren biktimak artatzeko telefonoa martxan dago 24 orduz (900 840 111); biktimak babesteko Segurtasun Sailak eskaintzen dituen zerbitzuak ere aktibo daude (bortxa telefonooa, genero-indarkerian espezializatutako ertzainak edo segurtasun pribatua, besteak beste); genero-indarkeriaren biktima diren emakumeentzako ordainketa bakarreko prestazio ekonomikoaren eskaerak ebazten jarraitzen dute; «bermatuta» daude Biktimei Laguntzeko Zerbitzua eta arlo judizialetako laguntza EAEn; emakumeen aurkako indarkerian espezializatutako epaitegiak; genero-indarkeriaren biktimentzako doako laguntza juridikoko zerbitzuak; etxeko tratu txarren biktima diren emakumeentzako berehalako harrera-zerbitzuak; biktima diren emakumeentzako egoitza-zentroak eta aholkularitza juridikoko eta laguntza psikologikoko zerbitzuak, eta Emakundek eskaintzen dituen bestelako zerbitzuak.

Nolanahi ere, egoera «aldian-aldian» aztertuko dela diote Emakundetik, «beharrak identifikatzeko eta zerbitzuak eta baliabideak horietara egokitzeko».

Era berean, herritarrei ematen dien zerbitzuari eusten dio telefono eta posta elektroniko bidez (945016702 eta emakunde.zuzendaritza@euskadi.eus). Gogorarazi dute, halaber, 112 larrialdiko aplikazioa martxan dagoela, 2018an eguneratu zena, eta entzumen- edo hizketa-zailtasunak dituzten pertsonentzat eskuragarria dela, eta GPS sistemaren bidez lokalizatzea erraztu dezake.