Lakuako Gobernuak AVTri bermatu dio euskal presoek ez dutela aldeko traturik jasoko urriaren 1etik aurrera EAEko espetxeen kudeaketaz arduratzen denean. Aurretik jada berretsia zuen «preso guztiek trataera berdina izango dutela».

Beatriz Artolazabal Lakuako Berdintasun, Justizia eta Gizarte politiketako sailburua, Jaime Tapia epailea eta eskumen honen garapenaren aholkulari nagusiarekin batera, AVT-ren ordezkaritza batekin bildu da asteazken honetan.

Artolazabalekin batera, Ana Agirre Justiziako sailburuordea eta José Antonio Rodríguez Ranz Giza Eskubide, Memoria eta Lankidetzako sailburuordea izan dira, bai eta Jaime Tapia ere.

AVTk ohar batean azaldu duenez, «kezkatuta» dago EAEko espetxe ereduarekin; izan ere, urriaren 1etik aurrera espetxeen kudeaketaren transferentzia gauzatuko da, hartu beharreko neurrien inguruko zenbait argibide eskatu dizkio sailburuari.

«Espetxe arloan zenbait erabaki hartu aurretik» biktimak kontuan hartzeko eskatu dute ere, neurriak legezkoak izan arren, kolektibo horrengan «etsipena» eragiten omen dutelako.

Birgizarteratzeko, presoak Justiziarekin modu «erreal eta eraginkorrean» elkarlanean aritzearen garrantzia aldarrikatu dute AVTko ordezkariek, baita presoek «errekonozimendu ekitaldi publikoak merezi ez izateko» konpromisoa izatea ere.

Iñigo Urkulluren Exekutiboak jakitera eman duenez, sailburuak bermatu die, hasieratik egin duen bezala, «ETAko presoek ez dutela inolako mesede-traturik jasoko» eskumena bere gain hartu ondoren.

Bileran, sailburuak berretsi du biktimak espetxe ereduaren «erdigunean» egongo direla, eta preso guztien «politika leheneratzailearen eta birgizarteratzearen» alde egingo dutela.

Artolazabal pozik agertu da Basauriko (Bizkaia) eta Martuteneko (Gipuzkoa) kartzelak bisitatu ostean egin den bileraren «giro adeitsuarekin».

Datozen asteetan Berdintasun, Justizia eta Gizarte Politiketako Sailak Euskadiko espetxe-eredua abian jartzeko hasitako entzuteko eta kontrastatzeko prozesuarekin aurrera egingo da, eta, hala, beste bilera batzuk egingo dira beste erakunde batzuekin.