Langabezian dauden pertsonen asanbladak, Argitan Emakumearen Aholku Etxeak, Berri-Otxoak gizarte-bazterkeriaren aurkako plataformak eta ELA, LAB, ESK, STEILAS, CGT eta CNT sindikatuek elkarretaratzea egin dute Barakaldoko justizia-jauregiaren aurrean, Amaia Egaña gogoratzeko eta omentzeko. 2012an egin zuen bere buruaz beste, etxetik botatzera joan zirenean.

Era berean, agerian utzi dute etxegabetzeak orain ere gertatzen direla eta kaltetutako familia barakaldarrentzako bizitoki-alternatibarik eza. Erakunde sozial eta sindikalek jakinarazi dutenez, 1.895 familiak jasan dute azken bederatzi urteetan beren etxebizitzaren utzarazpena herrian, eta, batez beste, hiru familia barakaldar baino gehiagok pairatzen dute egoera hori astero. «Haietako %87k alokairuko etxebizitza bat du; horietako batzuk bizi diren logelakoak ere badira, eta arazo larria da herrian etxebizitza duina eskuratzea», adierazi dute.

Kolektiboek eta sindikatuek Barakaldoko gobernu-taldeari eskatu diote larrialdietarako laguntzak eskuratzeko murrizketa-politikekin bukatzeko, eta etxegabetzeko arriskua geldiarazteko udaleko laguntza ekonomikoetara bideratutako aurrekontu-partida handitu dezala eskatu diote. Gainera, «legeak arautzen duen bezala», eskaerak egiteko epea urteko 12 hilabeteetan mantendu behar direla uste dute eragileek. Izan ere, Barakaldon otsailera arte itxi dela epea salatu dute.

Era berean, administrazioei exijitu diete alokairu sozialeko etxebizitzaren eta udal-etxebizitzen parke baten aldeko apustua egin dezatela, «etxegabetutako familiak berehala birkokatzeko».

«Etxegabetzeei buruzko protokoloa aplikatzea eskatzen dugu, Eusko Jaurlaritzak, Eudel Euskadiko udalen elkarteak eta Botere Judizialaren Kontseilu Nagusiak 2013an lortutako eta 2019ko otsailean berritutako akordioan aurreikusitakoa. Akordio horren arabera, gizarte-zerbitzuek berehalako erantzuna eman behar dute etxegabetze baten aurrean, batez ere adingabeak daudenean», adierazi dute.

Eragile sozial eta sindikalek, gainera, Arartekoaren, Estrasburgoko Giza Eskubideen Auzitegiaren edo NBEko Eskubide Ekonomiko, Sozial eta Kulturalen Batzordearen ebazpenei men egiteko deia egin dute, etxegabetutako pertsona eta familia guztiei bizileku-alternatiba bat eskaintzera behartzen baitute, eta are gehiago horiek adingabeak ardurapean dituztenean.

Kaleratzerik Ez! plataformak ‘Euskal Etxebizitzaren Legea’ garatu nahi ez izatea leporatu die EAJ eta PSEri.