NAIZ

«Etsipenaren» aurrean, erakundeetan nahiz kalean borrokan jarraitzeko deia egin du Sortuk

Hego Euskal Herriko hogeita hamar herritan mobilizazioak egin ditu Sortuk arratsalde honetan, Jon Paredes ‘Txiki’ eta Angel Otaegi fusilatu zituzteneko 47. urteurrenean, «Independentziarako indarra» lelopean.

Sortuk Gasteizen egin duen mobilizazioaren irudia.
Sortuk Gasteizen egin duen mobilizazioaren irudia. (Raul BOGAJO | FOKU)

Jon Paredes ‘Txiki’ eta Angel Otaegi fusilatu zituzteneko 47. urteurrenaren harira, «Independentziarako Indarra» lelopean mobilizazio eta ekitaldiak egin dituzte 30 herri eta eskualdetan, Sortuk antolatuta.  

Haimar Altuna Sorturen Nazio Kontseiluko kideak Bilbon egin duten manifestazioan parte hartu du, eta ‘Txiki’ eta Otaegiz gain haiekin batera «Euskal Herriaren alde ekarpen maila ezberdina eginez borroka egin duten herrikide guztiak» ere gogoan izan ditu.

«‘Txiki’k, Otaegik eta haien belaunaldiak itxaropena ekarri zioten herri honi. Haien borrokari esker pentsaezinak ziren eskubideak dauzkagu, eta gure helburuetatik hurbilago gaude. Baina ez dezagun ahaztu ziurgabetasun garai betean bizi garela, aurreikuspenak ilunak direla», ohartarazi du.

Ildo horretan, eta «etsipenaren aurrean, orain dela bost hamarkada bezalaxe», «esperantza» behar dela nabarmendu du. «Horregatik, borrokarako dei egiten dugu, kaleetan zein instituzioetan. Herri hau, beraz, zutik jarri beharra dago, independentzia, askatasuna, berdintasuna eta justizia soziala lortzeko», aldarrikatu du.

Irailaren 27aren karira plazaratu duen adierazpenean, Sortuk «egun kriminalizatzen eta jazartzen den memoria osorako eskubidea» aldarrikatu du, «etorkizunari begiratzeko eta elkarbizitzarako ezinbestekoa baita» indar abertzalearen iritziz.

Datozen egunetarako Bergaran, Zumaian eta Amurrion ere ekitaldiak iragarri dituzte.