Bilboko TMB Arraiz enpresan 50x10 metroko hormigoizko barne-horma bat erori zela eta latorrizko fatxadaren bi aldetan irekidura sortu zuela salatu du LABek. Honez gain, bioiragazkia aire zabalean geratu zela gaineratu. Gailu horrek fluido-korronte batetik konposatu kutsatzaile ugari ezabatzen ditu prozesu biologko baten bidez. Hori da konposatuak kanpora ateratzea ekiditzen duena. Langileek salatu dutenez, inork ere ez die argitu ea ingurumen-segurtasuna kolokan egon daitekeen. Zorionez, langileek ez zuten zauririk jasan istripuan.

«Enpresa batzordeak aspalditik adierazi izan du instalazioen egoera oso txarra dela, eta Lan Arriskuen Prebentzioko hainbat bileratan enpresari ohartarazi izan dio halakoak gerta zitezkeela. Era berean, LABeko ordezkariek azpiegituraren zein makineriaren mantentze-lan prebentiboak eskatu izan dituzte. Ildo horretan, joan den urriaren 18an, LAB sindikatuak, Enpresa Batzordearekin batera, bilera bat eskatu zion Bizkaiko diputatu nagusi Elixabete Etxanoberi, tratamendu-plantaren egoera negargarriaz hitz egiteko asmoz. Gaur-gaurkoz ez dute erantzunik jaso, eta, beraz, uste dute Aldundiak ez duela inolako asmorik lantegiaren egoerari heltzeko eta Zaldibarko kasuaren antzeko ingurumen- eta giza ondorioak izan ditzaketen istripuak saihesteko; izan ere, orduko hartan ere erakunde arduradunek entzungor egin zieten sindikatuen ohartarazpenei», nabarmendu du sindikatuak.

«Ez da zentro honetan antzeko zerbait gertatzen den lehen aldia; izan ere, 2022ko urrian latorrizko hormetako bat hegan atera zen, eta zulo handi bat utzi zuen heltze-eremuan. Arraiz TMB ABEEak bere funtzioak alde batera utzi ditu lantegia kudeatzen ari den hamar urteetan ez duelako beharrezko mantentze-lanik egin. Eraikinaren horma eta fatxaden egoera larriaz gain, hondatutako makinak daudela eta plantilla urriegia dela nabarmendu behar da. Horrenbestez, langileek Foru Aldundiari eskatzen diote, zerbitzuaren zuzeneko arduraduna den aldetik, premiazko bilera bat egiteko eta horrelakorik berriro ez gertatzeko behar diren neurriak hartzeko», gaineratu du LABek.

EH Bilduk inbertsio falta salatu du

Istripuaren berri izan ondoren, EH Bilduk kezka azaldu du eta instalazio horretan mantentze-lanik eta inbertsiorik ez egoteak segurtasuna eta ingurumen-helburuak arriskuan jartzen dituela salatu du.

«EH Bilduk lehendik ere jakin zuen, zenbait langilek egindako salaketaren bidez, plantaren mantentze-faltak instalazioen eta makineriaren prekarietateari eta narriadurari eragiten ziela. Eta, era berean, plantillan ordezkapenik ez zegoenez, plantilla ezin zela osorik egon. Bi inguruabar material eta pertsonal horiek pentsarazten digute solairu horretan arriskuan egon daitezkeela segurtasuna eta haren ingurumen-helburuak betetzea», azaldu du, Bizkaiko Aldundiak baldintza egokiak daudela bermatu behar duela gaineratuz.

«Horregatik guztiagatik, Bizkaiko Foru Aldundiko Batzar Nagusietan neurri ezberdinak aurkeztu ditugu lantegiaren egoera erreala zein den argitzeko, segurtasun-arazoren bat antzemanez gero, edo susmatzen diren segurtasun-arazoak eta eraginkortasun teknikoko arazoak berretsiz gero, esku hartu eta zuzendu ahal izateko. Horrez gain, informazio-eskaera eta galdera ezberdinak egin ditugu atal teknikoei buruz. Era berean, Batzar Nagusien hurrengo osoko bilkuran Ingurumen Naturaleko foru diputatuari ahozko galdera bat egingo diogu, eta Bizkaiko Batzar Nagusietako Ingurumen Naturaleko Batzordeari eskatuko diogu instalazioak in situ ikusteko bisita egin dezala», erantsi du.