Osakidetzaren Lehen Mailako Arreta indartzeko neurriak iragarri ditu Lakuako Gobernuko Osasun sailburu Alberto Martinezek. Hala nola, jakitera eman du 358 lanpostu gehiagorekin hornituko duela osasun zerbitzua, onartuta zeukan Lehen Mailako Arretako Estrategiaren barruan. Halaber, 120 milioi euroko inbertsioak iragarri ditu, 2025etik 2030era gauzatzeko asmoa dutenak, «osasun zentro berriak sortzeko eta daudenak hobetzeko».

Martinezek Gasteizen aurreratu ditu neurri horiek, Osakidetzaren funtzionamendua eta herritarrei ematen dien laguntza hobetzeko jarduera programa baten baitan. Jakitera eman duenez, datozen hilabeteetan amaituko da Osasun Sailak eta Osakidetzak bultzatutako Lehen Mailako Arretako Estrategiarekin hasitako plantilla hazkundearen hedapen osoa. Egitasmo horren ondorioz, 358 plaza gehitu dira asistentzia maila hori indartzeko.

Osakidetzak plantillen dimentsionamenduari buruzko azterlan bat egingo duela ere azaldu du sailburuak, zerbitzuak eta unitateak behar bezala betetzen direla bermatzeko. Ildo horretan, lehiaketa bidezko Lan Eskaintza Publiko bat egingo dute familia medikuentzako eta pediatriarentzako Lehen Mailako Arretaren eremuan medikuen betetze zaileko lanpostuetarako, EAEko Aurrekontuen Lege berrian xedapen gehigarriaren bidez gaituko dutena.

Mediku egoiliarren fidelizazioa

Halaber, mediku egoiliarrak eta profesional ‘seniorrak’ fidelizatzeko kontratazio programak bultzatuko dituztela iragarri du Martinezek. Horretarako, kontratazio programa espezifikoak ezarri dituzte.

Era berean, espezialitate berriak sortuko dituztela iragarri du, edo beste titulazio profesional batzuk sartzea sustatuko dute, medikuez edo erizainez gain. 2025eko lehen hiruhilekoan, optometrista eta psikologo komunitarioak sartuko dituzte.

Halaber, jakitera eman du Osasun Sailak EPE eredu berri bat garatuko duela behin-behinekotasuna %8ra murrizteko eta Lehen Mailako Arretako talde guztien plantillak egonkortzeko lehiaketa eta lehiaketa oposizio sistema arinagoen bidez, gaur egun Mahai Sektorialean negoziatzen ari direna.

Azpiegitura plana

Bestalde, 2025-2030 aldirako azpiegituren planak Lehen Mailako Arretarako zentro berriak aurreikusten ditu Araban (Gasteizko eta Laudioko Alde Zaharrean), Bizkaian (Boluetan, Bilbon, Arrigorriagan eta Urdulizen) eta Gipuzkoan (Txomin Enean, Donostian, Irun-Erdialdean eta Oñaurre Elgoibarren eta Lazkaon). Jarduera horietarako aurreikusitako aurrekontua 67,4 milioi eurokoa da.

Horretaz gain, 14,8 milioi euro bideratuko dituzte lehendik dauden Lehen Mailako Arretako zentroak handitzeko: San Ignazio (Bilbo) eta Sondika. Halaber, zazpi milioi euro inbertituko dituzte Santutxuko (Bilbo) eta Bergarako Lehen Mailako Arretako zentroen birgaitze integralerako.

Gasteizko San Martingo Etengabeko Arreta Guneaz, sailburuak adierazi du berriz ere irekiko dela 2025eko lehen hiruhilekoan eta jakitera eman du Alde Zaharreko osasun zentro berrian aurrera egiteko hitzarmena «desblokeatu» egin dela.