Kataluniako Parlamentuko bilkura atzeratzea erabaki du Roger Torrent presidenteak «Puigdemont hautatu ahal izateko bermeak lortu artean». Carles Puigdemontek egindako babes eskariari baietz erantzun dio Parlamentuko presidenteak eta adierazi du ez dutela ez Espainiako Konstituzio Auzitegiak ezta Soraya Saenz de Santamaria Espainiako presidenteak ere hautatuko Kataluniako Presidentea. 

Parlamentuak berak Konstituzio Auzitegiak ezarritako baldintzen aurkako auzibideak abiatuko ditu, Torrentek Puigdemonten aukerari eusten diola azpimarratu du: «Diputatuen gehiengoak bestelakorik proposatu ezean, ez dut Puigdemont ez den beste hautagairik proposatuko».