Derbia derbi, eta golik gabeko neurketa Ipuruan (0-0)

Lehiatua izan da oso Eibar eta Realak Ipuruan jokatu duten derbia. Futbola baino intentsitatea izan du gehiago, eta nahiz eta gol aukera ugariko neurketa izan ez batak ez besteak ez dute asmatu aurkariaren ate aurrean. [Neurketaren xehetasunak]

NAIZ|EIBAR|2018/04/01 20:30
Eibar_real
Derbi guztietan bezala, intentsitatea izan da protagonista nagusia. (Juan Carlos RUIZ/FOKU)

Partidu amaierako markagailuarengan bezainbeste ikusmin zegoen gaur Imanol Alguacilengan, Eusebioren ordez Realeko aulkia hartu duen oriotarrarengan. Bada nobedadeak erakutsi ditu Algucilek, hasierako hamaikakoan batez ere. Esaterako, hegaleko erdilari gisa aritu da Odriozola.

Osterantzean, intentsitate handiko derbia eta baloiaren jabetza, arraroa suertatu badaiteke ere, Eibarrena. Goitik behera agindu dute lehen zatian armaginek, eta gertu izan dute gola, behin baino gehiagotan gainera.

Cotek izan du lehen aukera garbia, baina areaz kanpotik egin duen jaurtiketak kanpora alde egin dio. Escalantek ere izan du aukera neurketa atsedenaldira iritsi aurretik, baina bere errematea Moyak geratu du.

Bigarren zatia beste martxa batean hasi da. Realak neurketako bere minutu onenak jokatu ditu, baina txuri-urdinei ere ihes egin die golak. Juanmi izan da donostiarren bigarren zatiko lehen aukera horien protagonista, baina William Jose izan da gola gertuen izan duena. 59. minutua zen Odriozolak baloia area txikian jarri dionean, baina gora alde egin dio erremateak brasildarrari.

Hortik aurrera Eibarren aldera erori da berriz partiduaren balantza. Area kanpotik ahalegindu da Pedro Leon hainbat aldiz eta aukera bikoitza izan dute armaginek 73.ean, baina ez Jordan ez Inui ez dira iritsi errematea gauzatzera.

Aldaketek eibartarrengan izan dute eragin hobea, baina hala eta guztiz ere ez dira gai izan Moyak babestutako atea zulatzeko.

Errepasatu neurketak utzi dituen xehetasunak NAIZen webgune berezian.