Tafallako Fagor Ederlaneko langile ohi bat hil da, amiantoa arnasteagatik

Tafallako Fagor Ederlan kooperatiban lan egin zuen behargin bat hil da amiantoaren ondorioz, ELAk ohar batean berri eman duenez. 1977tik erretiroa hartu arte lantegi horretan jardun zuen eta urte horietan amiantoaren eraginpean egon zen, «segurtasun neurririk gabe».

NAIZ|2020/09/18
Fagor-tafalla
Fagor Ederlan lantegia, Tafallan. (ELA)

ELAk ohar batean berri eman duenez, Tafallako Fagor Ederlan kooperatibako (lehen Victorio Luzuriaga) langile ohi bat hil da, amiantoa arnasteagatik. 

Azaldu duenez, 1977tik erretiroa hartu zuen arte egin zuen lan fabrika horretan eta urte horietan amiantoaren eraginpean egon zen, «segurtasun neurririk gabe».

«Heriotza horrek, berriz ere, bere gordintasun osoan kokatzen gaitu, amiantoarekin kontaktuan egotearen ondorioz lanbide-gaixotasunen dramaren aurrean», deitoratu du.

Ohartarazi duenez, «fenomeno hori gero eta handiagoa da, eta dimentsio ia pandemikoa du, hori guztia kontrol publiko eskasaren ondorioz eta joan den XX. mendean enpresek segurtasun neurririk hartu ez izanaren ondorioz».

ELAk doluminak eta atsekabea helarazi dizkio hildakoaren familiari, eta, aldi berean, enpresei eskatu die erantzukizunez joka dezatela eta «behingoz atzera egin dezatela bide judiziala beharrik gabe luzatzeko». Sindikatuaren iritziz, bide judizialak «eragindako pertsonen sufrimendua areagotzeko eta berriro biktimizatzeko baino ez du balio».

Horrekin batera, erakunde publikoei eskatu die «langile klasearen osasunerako eskubidea modu eraginkorrean bermatzeko behar beste baliabide eslei ditzatela», eta lantokietako produktu kantzerigenoak desagerrarazteko borroka egiteko konpromisoa berretsi du.

ERLAZIONATUTAKO ALBISTEAK