Bizkaiko Bertsolari Txapelketa 2021era atzeratu da

Udabarria Bertsotan fasea joan den ostegunean bukatu zen. 27 bertsolarik egin dute aurrera eta ondorioz erabakita geratu da Txapelketan zein bertsolari igoko den agertoki gainera. Baina albistea ostiral honetan etorri da, Bizkaiko Bertsozale Elkarteak hitzordua atzeratzea erabaki du.

NAIZ|2020/09/25
Mikel_retolaza
Mikel Retolazak irabazi zuen Derioko saioa ostegunean. (NAIZ)

Udabarria Bertsotan amaitu da eta Bizkaiko Bertsolari Txapelketan kantatuko duten bertsolarien zerrenda erabaki da. Hala ere, zalantza eta bilera askoren ostean, Covid-19ak eragindako egoera tarteko, Bizkaiko Bertsozale Elkartean Bizkaiko Bertsolari Txapelketa atzeratzea erabaki da, printzipioz, datorren urtera.

«Txapelketak parte hartzaileengan duen eragina handia da, euren ikusgarritasuna plaza honek ematen du eta hurrengo urteetarako plazak eskaintzen dizkie. Urte berezia da, eta zaila da aukera berdintasuna bermatzea egoera honetan. Batetik, saioen ezaugarriak pandemiaren bilakaeraren arabera aldatu daitezke eta, bestetik, sailkapen izaera duenez, saio batetan parte hartu ahal ez izateak, Txapelketa osoa galtzea eragingo luke», adierazi dute antolakuntzatik.

Dena den, Bizkaiko Bertsozale Elkartean uste dute Txapelketako saioak egiteko baldintzarik egon ez arren, bestelako saio mota asko antolatu daitezkeela guztion osasuna bermatuz. «Kultura segurua dela berretsi nahi dugu eta guztiok seguru egonda egiteko moduko saioak antolatu daitezkeela uste dugu. Horregatik, udazken honetarako bertso saioen zirkuitoxo bat antolatzen ari gara. Kulturak merezi duelako eta bertsozaleek ere bai. Aurrerago emango ditugu horri buruzko xehetasunak», gaineratu dute.