NAIZ
Donostia

Urtebetean 71 eutanasia eskaera jaso ditu Osakidetzak; 25 kasuk aurrera egin dute

Iragan ekainaren 25ean sartu zen indarrean eutanasia aplikatzeko legea eta, geroztik, Osakidetzak 71 eskaera jaso ditu. Horietatik 25 gauzatu dira eta beste hainbat kasu tramitatzen ari dira egun. Ordea, paziente batzuei berandu ailegatu zaie deliberoa eta lehenago zendu dira.

Hainbat eutanasia eskaera tramitatzen ari da gaur egun Osakidetza.
Hainbat eutanasia eskaera tramitatzen ari da gaur egun Osakidetza. (Getty Images)

Eutanasia arautzen duen legea 2021eko ekainaren 25ean indarrean sartu zenetik, Osakidetzak eutanasia aplikatzeko 71 eskaera jaso ditu guztira, eta horietatik 25ek aurrera egin dute. Beste batzuek, aldiz, izapidetzen jarraitzen dute eta zenbait kasutan eskatzaileak hil egin dira, Gotzone Sagardui Osasun sailburuak asteazken honetan jakinarazi duenez.

Euskadi Irratian egindako elkarrizketa batean, Sagarduik ziurtatu du Eutanasiaren Legea modu «azkar, eraginkor eta eredugarrian» aplikatu dela Araba, Bizkaia eta Gipuzkoan, bai eskatzaileentzat, bai profesionalentzat.

Ildo horretan, «eskubide bat arautzen duen» legea EAEn «oso ondo» garatu dela esan du Sagardui, eta profesionalek, «bai batzorde etikoetakoek bai ospitaleetakoek», «lan bikaina» egin dutela gaineratu du.

«Euskadin orain arte 71 eskaera egon dira, eta horietatik 25ek aurrera egin dute eta beste 25 pertsonari lagundu egin diegu azken unean. Batzuk oraindik izapidetzen ari dira, eta beste batzuk, tamalez, kasuak tratatu aurretik hil dira», azaldu du.

Nafarroari lotutako datuak, bestalde, iragan astean eman zituen Santos Indurain Osasun saileko arduradunak, zeinak baieztatu zuen urtebetean bost pertsonak baliatu dutela eutanasiarako eskubidea «berme guztiekin».