Haur-onkologiari buruzko ikerketa bultzatuko du Juneren Hegoak elkarteak 3.000 eurorekin

Juneren Hegoak elkarteak Euskal Herriko Pediatria Elkarteak kudeatutako haur-onkologiari buruzko ikerketa-proiektu bat bultzatuko du 3.000 eurorekin. Bekaren helburua da ekarpen ekonomikoa egitea pazientearen diagnostikoa, jarraipena eta tratamendua hobetzen lagunduko duen proiektu bati.

Juneren Hegoak elkarteak eta Euskal Herriko Pediatria Elkarteak III. June Sanchez Tolaretxipi Bekaren deialdia egin dute. Ohar baten bitartez azaldu dutenez, ekimen honen helburua haur-onkologiako ikerketa-proiektu bati finantza-laguntza ematea da, diziplina horrekin zerikusia duen edozein arlotan, eta paziente talde horren diagnostikoan, jarraipenean eta tratamenduan hobekuntzak egiten lagunduko duena. Aurten 3.000 euroko ekarpena egingo da.

Zehaztu dutenez, hautagaitza bat aurkezteko beharrezkoa da Euskal Herriko Pediatria Elkarteko bazkide izatea eta gutxienez bi urtez pediatriako zentro batean lan egin izana justifikatzea, bertako zuzendaritzaren ziurtagiri baten bidez. Eskaerak jasotzeko epea 2021eko uztailaren 1ean amaituko da, 23:59ean.

Elkarteek «jatorria, pronostiko faktoreak eta tratamendua» ikertzen dituzten proiektuak baloratuko dituzte, bai eta paziente onkologikoen «bizi-kalitatea hobetu eta onurak ekar ditzaketen teknika diagnostiko edo terapeutikoak ikastera bideratutakoak ere».

2015ean jarri zen martxan June Sanchez Tolaretxipi beka, eta orduan saritu zuten Idoia Garcia Camino doktorea, biomarkatzaileak meduloblastoman identifikatzeari buruz egindako lanagatik. II. beka 2018an eman zitzaien Itziar Astigarraga Aguirre ikertzaileari eta Susana Garcia Obregon biologoari, minbizia duten haur eta nerabeengan infekzio larriak diagnostikatzen dituzten markatzaileen azterketan egindako ikerketa-lerroagatik.

Juneren Hegoak

June neuroblastoma baten ondorioz hil zen duela urte batzuk. Horregatik sortu zen Juneren Hegoak GKEa eta, gaur egun, laguntza-sare bat sortzen du zaurgarritasun egoeran dauden Gipuzkoako familientzat, haur gaixo bat izatearen esperientzia bizi dutelako edo seme-alabak galtzearen doluari aurre egin behar diotelako. Era berean, bere eginkizun bera duten beste erakunde batzuekin elkarlanean aritzen da eta, ikerketaren bidez, «haurren gaixotasunen aurkako borrokan irmoki sinesten» du.

«Nahiz eta gaur egun egoera ekonomiko zaila bizi dugun elkartean, ahalegin bat egin nahi izan dugu, ekimen honen hirugarren edizio bat bultzatuz, aurreko edizioekin bat datorren ekarpen ekonomiko batekin. Gure ustez, beharrezko ekintza da, pandemiak ikerketa-proiektuak abian jartzean eta garatzean sortzen dituen zailtasunak kontuan hartuta. Uste dugu ikerketarik gabe ez dagoela itxaropenik, eta itxaropenik gabe ez dagoela», dio elkarteak