2025 IRA. 07 - 02:00h ZETAKek apustua igo du: ‘Mitoaroa III’, San Mamesen 2026ko ekainaren 20an San Mames estadioa beteko duen euskara hutsezko lehen show handia izango da ‘Mitoaroa III’; hau da, ZETAKek Iruñean hasi zuen trilogiaren bukaera. 2026ko ekainaren 20an izango da. Ostiraleko irudi ikusgarria. Igandean itxiko ditu ZETAk taldeak Ilunbeko hiru kontzertuak. (Jon URBE | FOKU) NAIZ 2026ko ekainaren 20an, San Mames estadioa beteko duen euskara hutsezko lehen show handia prestatu du ZETAK taldeak. Iruñean hasi, Donostian jarraitu eta Katedralean bukatuko baitu ‘Mitoaroa’ trilogia, etorkizunari begira. ‘Mitoaroa III’ izena izango du eta, taldeak berak aipatu duenez, «San Mames beteko du. Bere osotasunean euskaraz egindako ikuskizun batek estadio bat betetzen duen lehen aldia izango da eta Bizkaia kultura maparen erdigunean kokatuko du».Albistea ‘Mitoaroa II’-ren Ilunbeko bigarren ikuskizunean eman dute jakitera. Ikus-entzunezko pieza edo trailer ikusgarri baten bidez, ikusleek jakin dute ‘Mitoaroa’ trilogia bilakatuko dela.«Aurrekaririk gabeko iraultza teknologikoak XV. mendera eraman gintuen. ‘Mitoaroa I’ (oraina) eta ‘Mitoaroa II’ (iragana) ondoren, ‘Mitoaroa III’-k beste jauzi bat egingo du: etorkizunari begirako ikuskizuna izango da, San Mames euskal kulturaren bozgorailu handia bilakatzeko pentsatua», iragarri du Pello Reparazen taldeak. Sarreren aurresalmenta irailaren 10ean (asteazkena) irekiko da eta salmenta orokorra irailaren 11n (osteguna) goizeko 10.00etan. Ekitaldi hau Bizkaiko Aldundiaren babesarekin ospatuko da. Euskal komunikabideen babesa ere jaso du: NAIZ ere izango da ekitaldiaren babesle.