2015 UZT. 28 Leuzemia eragiten duten mutazio genetikoak identifikatu dituzte Maialen ARRATIBEL gAsteiz Leuzemia linfatiko kronikoa duten gaixoen genoma osoa sekuentziatu dute Deustuko Unibertsitateko eta Euskal Herriko Unibertsitateko Zuzenbide eta Giza Genomako Unibertsitate arteko Katedrako ikertzaileek, baita gaixotasun horren gaineko ekarpen berriak egiten dituzten mutazioak identifikatu ere. Euskal Herriko ikertzaileek Leuzemia Linfatiko Kronikoaren Genoma Aztertzeko espainiar Partzuergoaren baitan egiten dute lan. “Nature” zientzia aldizkarian argitaratu berri dituzte ikerketaren emaitzak eta ikerlanaren arduradunek azaldu dutenez, argitalpena «mugarria» da Estatu espainoleko ikerkuntza zientifikoaren alorrean. Izan ere, leuzemia linfatiko kronikoa da tumore guztien artean ohikoena eta, 500 paziente baino gehiagoren zelula normal eta tumoralen genomak sekuentziatu izana, «aurrerapauso handia» da bai gaixotasunaren jatorria bai garapena ezagutzeko bidean. Minbiziari aurrea hartuz Ez da hori, ordea, emaitzek ekarriko duten lorpen bakarra. Izan ere, tumore zehatz baten garapenean eragiten duten aldaketa genetikoak ezagutzeak minbiziaren tratamendua «hobetzeko» balio duela zehaztu dute ikerketako EHUko kideek. Horrez gain, Doitasun-Medikuntza izeneko zientziaren alorrean, gaixotasunari «aurrea hartu» ahal izatea espero dute. Bide horretan, analisi genomikoak eginez, gaixoen sailkapen «zehatzagoak» ahalbidetuko dituzte eta beraz, tratamendu «pertsonalizatuagoak», betiere detektatutako mutazio genetikoetan oinarrituta.