«Naparra»-ren familia, NBEko behartutako desagerpenen lantaldearen urteurrenean

Genevara egindako bisitaren amaiera gisa, non NBEko behartutako desagerpenei buruzko lantaldearekin elkarrizketatu baitzen, Jose Miguel Etxeberria «Naparra»-ren familiak erakunde horren 40. urteurreneko ekitaldian parte hartu zuen ostiralean. Ekitaldi horretan ez zen izan ez Madrilgo ez Parisko gobernuen ordezkaririk.

Jose Miguel Etxeberria Naparraren senitartekoek amaiera eman diote Genevara egindako bisitaldiari, behartutako edo nahi gabeko desagerpenei buruzko lantaldearen 40. urteurrena ospatzeko ekitaldian parte hartuz. Hain zuzen, 2020. urte honetan justu lau hamarkada betetzen dira Komando Autonomo Antikapitalistetako militantea desagerrarazi zutenetik (urteurrena ekainean izango da).

Ekitaldi honetarako gonbidapena asteazkenean egin zieten, Eneko Etxeberriak, Naparraren anaiak, kasuari buruzko azken informazioak helarazteko lantaldekoekin izandako bilera pribatuan. Taldekideen hitzetan, euskal kasu honek zehazki islatzen du erakunde hau Nazio Batuen Erakundean zergatik sortu zen, eta, gainera, urte berean gertatu ziren Naparraren desagerpena eta NBEko lantaldearen sorrera.

Eneko Etxeberriak NAIZ webguneari azaldu zionez, ekitaldia Suitzako hirian izan zen ostiralean, Nazioen Jauregiko IX. aretoan. Mundu osoko ordezkaritza ugari bertaratu ziren, nahiz eta Espainiako eta Frantziako estatuetako ordezkaririk ez egon.

Lantaldeko presidente errelatoreak, Luciano Hazan argentinarrak, efemeride honetarako egindako bideo bat aurkeztu zuen. Bertan azaltzen da Nazio Batuek lantaldea sortzea erabaki izanaren jatorria eta zergatia, neurri handi batean desagertutako pertsonen milaka senidek egindako lanak bultzatuta.

Taldeko egungo kide eta presidente ohi Bernard Duhaime kanadarrak bere lanaren hasierako epea urtebetekoa zela nabarmendu zuen.

Zoritxarrez, mundu osotik iristen ari zitzaizkien milaka eta milaka kasuen aurrean duten beharrak 40 urte betetzea eragin du, eta hortik ondorioztatzen da benetan ez dagoela ospatzeko ezer, garatu beharreko zeregin izugarria baizik. Bere lehentasuna desagertutako pertsona horiek aurkitzea da oraindik ere, senide guztiak desagertze horiek salatzera animatzea eta gobernuei kasuok ikertzeko eta argitzeko eskatzea.

Ildo horretan, Houria Es-Slami lantaldeko adituak gobernuei dei egin zien ikerketetan lagun dezatela, artxibo ofizialak publiko eginez.

Dokumentala martxan

Ekitaldiaren amaieran, gonbidatuen txandan, Eneko Etxeberria Alvarezek eskerrak eman zizkion lantaldeari, bai 2014tik egindako lanagatik, bai Jose Miguel anaiaren desagerpen behartuaren kasuak gaur egun duen babesagatik.

Euskal Memoria Fundazioak argitaratutako Joseba Zabalza argazkilari iruindarraren “Nombres para recordar” liburuaren ale bat eraman zuen Etxeberriak. Bertan 1937tik hona Euskal Herrian izandako ehun bat giza eskubideen urraketa jasotzen dira, eta Nazio Batuen Erakundeko behartutako desagerpenei buruzko lantaldearen dokumentu funtsaren parte izatera pasako da.

Aurreko egunean, ostegunean, Luciano Hazan presidente errelatoreak Eneko Etxeberriarekin aurrez hitzartutako bilera labur bat izan zuen.

Bilera horren irudiak jaso eta “Bolante baten Historia” dokumentalean sartuko dituzte. Iñaki Alforja eta Iban Toledo errealizadoreak ari dira egitasmoan lanean, Etxeberria Alvarez familiaren erabateko laguntzarekin.