1.500 euroko gutxieneko soldata proposatu dute sindikatuek

«Langile guztientzat» 21.000 euro gordineko soldata, 1.500 euro hilean, izatea adostu dute ELA, LAB, ESK, Steilas, Etxalde eta Hiru sindikatuek, bi urteren buruan horretara heltzeko. Patronalek proposamena entzuteari uko egin diotela gaitzetsi dute sindikatuek.

ELA, LAB, ESK, Steilas, Etxalde eta Hiru sindikatuek hilean 1.500 euroko gutxieneko soldata propioa proposatu dute Araba, Bizkai eta Gipuzkoarako, 21.000 euro gordin. Horretara modu mailakatuan iristea nahi dute, bi urteren buruan hain zuzen, eta Materia Zehazteko Akordio baten bidez adostea planteatzen dute.

Atzo Bilbon egindako agerraldian salatu zutenez, ordea, «martxoaren 20ko mahaira eramango dugun proposamena maila pribatuan landu gabe publiko egitea dagokigu». Izan ere, Confebasken barruan dauden Adegi, Cebek eta SEA patronalek nahiz Lakuako Gobernuak ez dute sindikatuekin biltzeko proposamena onartu.

Imanol Pradales lehendakariak eta Mikel Torres Enplegu sailburu eta lehendakariordeak ez diote sindikatuen bilera eskaerari erantzun. Sindikatuen arabera, Pradalesek, «gainera, patronalaren diskurtsoa erosi eta gutxieneko soldataren negoziazioa produktibitate eta absentismoarekin lotu du, patronalari eginiko keinu argi batean».

Gipuzkoako Adegi, Bizkaiko Cebek eta Arabako SEA patronalek, bestetik, bilera egiteari uko egin diote. Sindikatuek gaitzetsi dutenez, «herri honetako gehiengo sindikalari atea ixtea erabaki dute». Hori dela eta, «herri honetako patronalak egoerak eskatzen duen mailatik oso urrun daudela» erakusten dutela uste dute. «Langileoi aukera bakar moduan gatazka uzten digun patronala ez da herri honek behar duen patronala», adierazi zuten.

LAKUAREN BABESA PATRONALARI

«Bertako gutxieneko soldata baten aldekotasuna azaldu du Eusko Jaurlaritzak, eta posizio argia hartzea dagokie orain», esan zuten. Hala ere, patronalak «herri honetan sortzen den aberastasuna ez birbanatzea» erabaki duela uste dute, Lakuaren babesa duelako. Pradalesen Gobernuari, beraz, «patronalari keinuak egiteari utzi eta presionatu» eta «hain naturalizatuak dituzten harremanak baldintzatu eta mezu argiak bidaltzea» dagokiola nabarmendu zuten.

Gogorarazi dutenez, gutxieneko soldata propio bat beharrezkoa da «milaka langileri zuzenean eta lan eta bizi baldintzak hobetu ahal izateko, nagusiki eta zuzenean emakumeei, langile migratu eta arrazializatuei, aniztasun funtzionala duten langileei eta gazteei», laburbildu dute sindikatuek, proposamena «langile klase osoarentzat» onuragarria izango dela gaineratuz.