Marrazoen xuxurlaria

M arrazoak duela 400 milioi urte baino gehiagotik bizi dira Lurrean, eta ezinbestekoak dira itsas ekosistemen osasunerako. Hala ere, urtero 100 milioi marrazo inguru hiltzen dira. Hori da “Shark Whisperer” dokumentalak ematen duen datu kezkagarria. Lan honen protagonista Ocean Ramsey da: itsas kontserbazionista eta sare sozialetako aktibista, marrazoen artean kaiolarik gabe igeri egiteagatik ezagun egin dena. Bere helburu nagusia marrazoak salbatzea eta espezie hau babesteko premia lau haizeetara zabaltzea da.

Marrazoen defendatzaile sutsua izanik eta animalia horien irudi publikoa aldatu nahirik, haiekin kaiolarik gabe igeri egiten hasi zen. Dokumentalak aurrez aurre izandako topaketen irudi ikusgarriak eskaintzen ditu; tentsioz eta edertasunez betetako uneak dira, edonor aho zabalik uzteko modukoak.

Lan ederra da, hunkigarria bezain probokatzailea. Ramseyk marrazoekin egindako lanari filtrorik gabeko leihoa eskaintzen zaio, eta hainbat gogoeta eragiten ditu.

Eskertzekoa da dokumentalak ahots kritikoei uko egin ez izana: biologoek zein aditu batzuek zalantzan jartzen dute Ramseyren interakzioek ez ote dituzten marrazoak estresatzen, haien jokabide naturala aldatzen eta aktibismoaren eta ikuskizunaren arteko mugak lausotzen.

David Shiffman eta Michael Domeier zientzialariek, adibidez, ohartarazi dute kaiolarik gabeko hurbilketa horiek jokabide arriskutsuak eragin ditzaketela prestakuntza egokirik gabe. Eztabaidatik harago, Ramseyren lanak fruituak eman ditu: 2019an, erregistratu den marrazo zuri handienarekin igeri egin zuen.

Irudiek munduari buelta eman zioten… eta, azkenean, giltzarri izan ziren Hawaiik marrazoen arrantza ofizialki debekatzeko.