2019/11/25

EAEko herritarren %72 hiru metropoli-eremutan bizi da

Bilbo, Donostia eta Gasteizko metropoli handiek EAEko biztanleriaren %72a biltzen dute, eta landa-eremuetan, 2.000 biztanle baino gutxiagoko herrietan, herritarren %2 bizi da soilik.

Gaur8
Euskalhiria
Euskal Hiria kongresuan parte hartu duten bozeramaileak.

Urbanizazio-maila handiena duen Europako eskualdeetako bat da EAE; izan ere, biztanleriaren %72 hiru metropoli-eremu nagusietan biltzen da, eta %2 soilik bizi da 2.000 biztanletik beherako udalerrietan, landa-eremutzat jo daitezkeenetan.

Datu horiek Gasteizko Gobernuak onartu duen Bultzatu 2050 Hiri Agenda berrian ondorioztatu dira. Agenda hori astelehen honetan aurkeztu da Donostian, Lakuak, Habitat GKEarekin lankidetzan, Kursaalean bi egunez egiten ari den Euskal Hiria kongresuaren barruan.

Ingurumen, Lurralde Plangintza eta Etxebizitzako sailburu Iñaki Arriolak ireki du aurkezpena, eta datozen 30 urteetarako EAEren garapen jasangarria markatuko duen dokumentu horren garrantzia nabarmendu du, besteak beste, honako arlo hauetan: ingurumena eta larrialdi klimatikoa, lurzoruaren erabilera, energia, mugikortasuna eta gizarteratzea.

Azken helburua «hiri eta herri inklusibo, seguru, erresiliente eta iraunkorrak lortzea da, inor atzean gera ez dadin», azaldu du Arriolak.

Etxebizitzaren arloan, parke publikoa hobetzearen, etxegabetzeak prebenitzearen eta eraikinen birdiseinua sustatzearen aldeko apustua egiten du agenda berriak; mugikortasun-arloan, berriz, hiriguneak oinezkoentzat bihurtzea, emisio txikiko ibilgailuen erabilera bultzatzea edo azpiegitura berde berriekin plangintza iraunkorra egitea planteatzen du.

Berrikuntzak, prestakuntza-eredu berriekin, udal-zerbitzuen digitalizazioak edo 5Gren hedapenak ere bultzatu asmo ditu Gobernuak. Barne hartutako helburuen artean daude, halaber, uraren erabilera murriztea, berotegi-efektuko gasetan eraikin neutralen aldeko apustua egitea edo fiskalitate berdea deiturikoa sustatzea.