Rafael Moreno Aranzadi (Bilbo, 1892-1922), Pitxitxi ezizenez ezaguna, Athleticeko eta euskal futboleko golegile nagusienetakoa izan zen. 1913ko abuztuaren 21ean, San Mames futbol zelaiaren estreinako partidan, Irungo Racingen aurka, lehen gola sartu zuen zelaiaren historian. Bere aita, Joaquin Moreno Goñi, Bilboko alkate izan zen XIX. mendearen amaieran, eta Pitxitxi Miguel de Unamuno idazlearen iloba zen. Aurrelari bezala jokatzen zuen eta lau Kopa irabazi zituen Athleticekin (1914, 1915, 1916 eta 1921). Bere azken partida 1921eko irailean jokatu zuen. Aurrelari apartaren ezaugarri bereizgarria buruan beti zeraman zapi zuria zen. 1921ean egindako egile ezezaguneko argazkian, Athleticeko beste kide batzuekin batera agertzen da: zutik, Hurtado, Moreno Aranzadi (Pitxitxi) eta Acedo; eserita, Otxandiano, Urrutia eta Zabala. Bere kirol ibilbidean 83 gol sartu zituen. Pitxitxi 1922ko martxoaren 1ean hil zen, 29 urte besterik ez zituela.