Bere idazle ibilbidean irabazten duen bigarren saria da Garazi Kamiorentzat (Andoain, 1979). Igartza Saria eskuratu zuen 2011n ‘Gerizpeko panpinak’ proiektuarekin eta urtebete beranduago argitaratu zuen lehenengo liburua sariari esker ‘Beste norbaiten zapatak’ izenburupean.

Augustin Zubikarai nobela-bekaren irabazle izan da kasu honetan, ‘Orube abandonatuak’ egitasmoari esker. Hiru garai desberdinetan, hiru pertsonaia bakartiren historia kontatuko duen nobela izango da.

Xabier Mendiguren, Leire Bilbao eta Ana Urkizak osatutako epaimahaiak «testuaren fintasun psikologikoa eta irudien indarra» azpimarratu ditu.

Elkar argitaletxeak jakitera eman duenez, 35 izan dira guztira aurkeztutako lanak, inoizko kopururik handiena.