Prezioak garestitu egin dira Hego Euskal Herrian irailean aurreko hilabetearekin alderatuta, INE estatistika institutu espainolak zabaldu dituen datuen arabera. Igoerarik handiena Gipuzkoan izan da, %0,4 igo baita irailean.

Nafarroan igoera %0,3koa izan da, eta Bizkaian, %0,2koa. Araban ez da aldaketarik izan Kontsumorako Prezioen Indizearen (KPI) eboluzioan.

Urte artekoari erreparatuta, inflazio tasa %0,2koa da Gipuzkoan, eta hamarren bat baxuagoa Bizkaian. Araban ez da aldaketarik izan eta Nafarroan balio negatiboetan jarraitzen du (-%0,3) urte arteko inflazioak.

INEren arabera, argindarraren eta jakien prezioen garestitzeak eragin du KPIren igoera irailean.