Kordoba eta Villenara martxak, bertan preso direnen sustenguz

Alacanteko Villenako espetxera eta Kordobakora martxa parea egin dituzte asteburuan Burlata eta Portugaleteko herritar talde banak. Villenara Maria Lizarragaren sustenguz egin zuten martxa eta Andaluziako espetxera bi hamarkada kartzelan bete dituzten Iñaki Alonso eta Aitor Fresnedori babesa adieraztera.

Burlatako herritarrak Villenako espetxearen atarian.

Portugalete eta Burlatako herritar talde banak Kordoba eta Villenako (Alacant) espetxeetara martxak antolatu dituzte asteburuan.

Portugaleten ‘20 urte kartzelan’ dinamika abiatu zuten orain bi hilabete eta horren baitan egin dute martxa. Herriko Iñaki Alonso presoak 21 urte beteko ditu espetxean abenduan eta Aitor Fresnedok ere antzeko egoera bizi du. Ostiral gauean abiatu ziren Bizkaitik eta larunbata goizean iritsi ziren espetxera. Kanpoan egin zuten ekimena, bi baflerekin euren elkartasuna presoei helaraziz. Ekitaldi txiki bat ere burutu zuten. Bisita zutenen ahotik jakin ahal izan zuten presoek entzun zituztela euren mezuak.

Portugaleteko herritar taldea Kordoban.

Antzeko ekimena Burlatako hainbat herritarrek egin zuten Villenara. Kasu honetan Maria Lizarraga herrikideari adierazi nahi zioten elkartasuna. Abuztutik espetxe horretan dagoen kolektiboko kide bakarra dela salatu dute nafarrek eta egunean 23 ordu bakarrik igarotzen dituela.