Martxoaren 8aren bezperan, agerraldia egin dute Maddalen Iriarte Gasteizko Legebiltzarrean EH Bilduren bozeramaile denak eta koalizioaren Idazkaritza Feministako arduradun Monika Plazaolak ezker subiranistaren irakurketa plazaratzeko.

Lehenik eta behin, Plazaolak gogoratu nahi izan du «sektore estrategikoetan, hala nola osasungintzan, elikaduran edo hezkuntzan, larrua utzi duten funtsezko sektoreetan lan egiten duten pertsona guztiak», eta eskatu du «jendearen bizitza zehatzaz hitz egitea ikuspegi feminista batetik».

«Osasun-krisi honen kudeaketa betiko parametroei erantzuten ari zaie, neoliberalari eta patriarkalari, eta, horrela, genero-arrailak areagotzen ari dira. Berriro ere, emakumeak dira pandemiari aurre egiteko zeregin gehienak beren gain hartu dituztenak, bai funtsezko lan-jardueretan, baita etxeetan ere, zaintzen ardura hartuta», adierazi du EH Bilduko Idazkaritza Feministako arduradunak.

Horregatik, Plazaolak uste du «beharrezkoa» dela «emakumeen bizitzei buruz hitz egitea», hala nola «covid-19ak emakumeengan duen eragin handiagoaz», «beste osasun-arazo batzuei (osasun mentalari, adibidez) arretarik ez emateaz», «adinekoak egoitzetan jasaten ari diren eskubideen urraketaz» edo «krisi honetako desberdintasunen gorakadaz», besteak beste.

«Ezinezkoa da errealitate horien guztien zerrenda zehatza egitea», azaldu du Plazaolak, eta gaineratu du «kolektibo horietako emakumeak direla gizonezko trajedunak euren bulegoetan kudeatzen ari diren krisi horrek gehien kaltetu dituenak».

Manifestazioak eta greba Ipar Euskal Herrian

Maddalen Iriartek ere «pandemia horren kudeaketa» kritikatu du eta «politika feministen beharra» defendatu du, hain zuzen ere «hurrengo belaunaldientzako etorkizuna bermatu» behar duen eredu bat.

«Krisi honetatik eraldaketa eta justizia sozialaren norabidean atera beharra dago: erronkak handiak dira, ez ditugu erantzun guztiak, eta titular handiek ere ez digute balio. Eta gobernatzen dugun udalerrietan kudeaketa erronka ezin handiagoa izan den azken urte honetan praktikan horixe jartzen ari gara: gure kargu publikoak larrua uzten ari dira gauzak beste modu batez egiteko, herritarrengandik hurbil eta herritarrekin egoteko eta tokian tokiko pertsonak tokian tokiko politiken erdigunean jarri nahi dituzten politikak bultzatzeko. Hori da benetako aldaketaren gakoa», esan du bozeramaileak.

Azkenean, Iriartek koalizioaren izenean konpromisoa hartu du «politika horiek mugimendu feministarekin batera pentsatu eta diseinatzeko, baita erabakiak hartzetik kanpo geratu diren beste kolektibo eta eragile batzuekin ere».

Era berean, herritar guztiak animatu ditu mugimendu feministak martxoaren 8rako deitutako mobilizazioetan parte hartzera arduraz, pandemia egoeratik eratorritako segurtasun-neurri guztiak betez, eta bat egin du ere sindikatuekin batera Ipar Euskal Herrian egin den greba deialdiarekin.