NAIZ

Endika Saez de Adana hautatu dute EH Bilduko udalerriko arduradun politiko berria Gasteizen

Endika Saez de Adana udalerriko arduradun politiko berria hautatu dute EH Bildu Gasteizek Goiuri Jauregian egin duen batzarrean. Bertan egon da Felix Gonzalez EH Bilduk Gasteizko Udalean duen bozeramaileak. «Iraganeko inertzia kontserbadoreei eusteko tentazioen aurrean», eraldaketa proposatu du.

Gasteizko batzarrean parte hartu duten EH Bilduko kideak. (EH BILDU GASTEIZ)
Gasteizko batzarrean parte hartu duten EH Bilduko kideak. (EH BILDU GASTEIZ)

EH Bildu Gasteizek batzarra egin du larunbat honetan Goiuri Jauregian. Batzar horretan, datozen urteetan koalizioa zuzenduko duen mahai politikoa berretsi dute eta Endika Saez de Adana udalerriko arduradun politiko berria hautatu dute.

Felix Gonzalez EH Bilduk Gasteizko Udalean duen bozeramaileak adierazi duenez, politikan oinarrituta udalerrian gehiengoa duten balio aurrerakoiak bultzatzen jarraitu nahi dute. «Parekidetasuna, feminismoa, ekologismoa eta justizia sozialerako borroka, besteak beste, nagusi dira gure hirian. Lanean jarraituko dugu gehiengoaren jarrera horiek benetako isla izan dezaten etorkizuneko Gasteiz marrazten duten erabaki eta proiektuetan. Posible da hori lortzea: gehiengo sozial eta politiko hori existitzen da», adierazi du.

Eta, aurreratu duenez, EH Bilduk bere jarduera soziala «biderkatzeko» asmoa du, auzoz auzo, herritar guztiei norabide aldaketa bat lortzeko proiektu eta proposamenetan parte hartuz eta ekarpenak jasoz. «EH Bilduk herritarrengandik hurbil egon nahi du, haiekin planak, proiektuak eta ideiak partekatu nahi ditu eta haiekin batera parte hartu. Auzoz auzo, etorkizuneko Gasteiz eraiki nahi dugu», azaldu du.

«Iraganeko inertzia kontserbadoreei eusteko tentazioen aurrean, EH Bilduk aldaketa, eta eraldaketa, prozesu horren eragile eta laguntzaile izaten jarraitzearen aldeko apustua egin du, aurrean ditugun erronka handien aurrean», ohartarazi du alderdiak ohar batean.